•·.·°¯`·.·•مـنـتـدى إيـرآســـآ درنـة •·.·°¯`·.·•
{ نورت } ... آلمنتدى ضيفنآ آلكريمـ

•·.·°¯`·.·•مـنـتـدى إيـرآســـآ درنـة •·.·°¯`·.·•


 
الرئيسيةالتسجيلدخول

شاطر | 
 

  حكايتي امغير اسمعوها

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : 1, 2, 3, 4  الصفحة التالية
كاتب الموضوعرسالة
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: حكايتي امغير اسمعوها   الخميس يناير 19, 2012 10:36 pm

باه واخيرا تم لقائي بيكم

اجعل سعدكم لقدام وحنتكم في الاقدام زعما منين بنحكي وكيف نبدأ

وزي مايقولوا علي الاول ماتبدينا علي محمد صلينا

انا العبد لله ا والفتي من قال انا ومقالش بوي اسمي عندكم مواطنة ليبية واسمي عند بوي او باطي كله واحد الليلة الحرفة سماني هالاسم علي عمتي وتعالوا معاي نحكيلكم سر اسمي وردوا بالكم اتقولو لحد راهو بعدين معاش انكونوا اصحاب واحباب ومانترحموش علي اللي عندكم دخلني وليكم جاب كان لجدي 6اولاد تريس عصرانة وكان يتمني السابع يكون تراس ايقيم الراس لكن عاد رحم حناي قال ماانطلع غير طفلة وجت عمتي للذنيا وطلعت الخادم تجري لجدي تبي تسبق غيرها في البشارة لكن ياخسارة زعل جدي ولوا جرده علي رقبته وقاللها ياوجه الغراب بعدك علي الصواب شنو بيكون اسمها غير الليلة الحرفة وكبرت الليلة الحرفة وفي يوم كان عيد تريس جدي عليه لاهيين مع انساوينهم وفروخهم لما جدي دارت بيه لايام وخلاته علي الفراش اينام ماهي مقيولة الوسادة غلبت الودادة وجي وقت الغداء وجابت عمتي الاكل لبوها وامها ومشت وبعد مااكل جدي قال لحناي منو من اولادك ودنا بهاالغدوة المقومة قتله هذه بنتك الليلة الحرفة اتنهد جدي وقال اريتهم كلهم جوني الليلة الحرفة وهذا هو سر اسماي وكانكم بتسالوا علي نسبي شدو عندكم من غربا ومن شرقا وحتي النواحي الاربعة امي لاتعرف تقرأ ولاتكتب ماهو ازمان كانت المرا ماليها غير بيتها وعنوانها قصعتها وقتلت قملتها اما باطي مايعرف من القراءة غير الحساب وانا ارحم من ورا وقرا لكن ياخسارة بدون تعيين من 10 سنين لين اللي اقريته انسيته وصلوا علي النبي عندي عشرة خوت الواحد منهم يردع مئة لكن يحسرة مافالحين غير في بعضهم اتقولوا اعليهم مكاليب

واني قاعدة مع بوي اللي من فجر ربي وهو في جرتي بالعصا نوضي يابنت وانوض نحلب البقر ونوكل السعي والمعيز ونطيب الشاهي علي كنون ونعمل العصيدة والزميطة ونعطيهم يكالوا واني نتفرج عايشة ومش عايشة وقتي كله بين الدجاج والفراريج وعياط سيدي وعراك انسوين خوتي شوقني فيهم والزيزة املي مفقود فيها من قبل يازين مبهاه يابال سلو اعموده عام حرف امشوم مظلم علي روسهم الحرب غبرت فينا شوية الرجالة اللي فضلت من تشاد ضاعت بين التحرير والتطهبر كنت انقول كان انتبيت انريد وعدة وتوا منين يحسره كلهم ماتوا وماقعدوا فيها غير الفروخ ايتحاوسو وتوا تبقوا في خير وخمير وغدوة انكملوا حكايتنا وقعدتي معاكم ولمتنا
الرجوع الى أعلى الصفحة اذهب الى الأسفل
الغزال الشارد
القلم الذهبي
القلم الذهبي


عدد المساهمات : 1773
نقاط : 2097
تاريخ التسجيل : 12/07/2010
الموقع : هنا وهناك

مُساهمةموضوع: رد: حكايتي امغير اسمعوها   الجمعة يناير 20, 2012 4:56 am

اهلا وسهلا بمواطنة ليبية بيننا في ايراسا قصدي منتدي ايراسا حللت اهلا ونزلت سهلا
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الجمعة يناير 20, 2012 5:56 am

صباحك خير يغزال الجوبة

وحتي بشرودك مازلتي مرغوبة

راهو ياغزال حتي اني زيك نفهم في الحب والسياسة لكن ياخسارة خوتي والداموس اللي ماطلعت منه غير 3 مرات لهاني علي هلبة حاجات

وانشا لله اني وانتي يابنت روما وراهي هذي مش مسبه تخليني في عقلك مدمومة

انكونو صاحبات ورفيقات
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الجمعة يناير 20, 2012 8:33 am

اليوم فقت علي عيطة شقت السموات السبعة ومانزلت ونوضت مفجوعة علي صوت امي وهي اتقول وك واك فيا مافي حد وقبل لاتكمل امي نواحها درت سواقيني في ايديا واطلقتهم للريح اتقولوا عليا عجاج بنشوف وين العياط والبوني هي يالعتي يانجهة ا خوتي القوية العياط طالع من وراء حوش خوي برق الليل مراته نازله في سلفتها تنتيش وتريش وما وصل فيهم بوي لين اتلمت العرب من كل تركينة شنو بنحكلكم مرات خوي الكبير قالت لولد خوي الصغير روح لامك ياولد الطحلوبة وتسمعها امه وتجيها تجري شنو قالوك عليا عائمة في الجوابي تعالي جاي ياجردة مكلبوبة توا انطلعه منك تاني ومثلت وهذه حكايتنا كل يوم انوضوا ونرقدوا علي ها الموال

وامي المسكينة هاالكناين المنجوهات ماركبوها غير السكر والضغط امي ياما اتعاني من غصايص كناينها من جهة وبوي واولاده من جيهة من عام 96 واميمتي تعاني ومعندهاش موال غير خوتك روحوا والا مازال وماترقد لين كل واحد اينخمد في فراشه

خوتي من الاخير خاشين في موال من هذاك العام موال امي ماتفهمه وكان بنشرحها اتفيض مرارتي وهي باكو امسكر المختصر المفيد 2 من خوتي كانوا شادين الركاب لكابول واربعة التجارة واخدتهم في موالها وواحد الشيشة والحبوب و3 نازلين في الجيش داحيين بين الوطية والابرق والويغ وبوي ماعنده خدمة غير برم اشناباته

ويتحسر علي ايام اللي كان ايعد في روحه للبرلمان يورت مقعد جدي اللي اعطاكم عمره واني بين المدرسة والحوش والسروح بالسعي وضيوف بوي اللي مايكملوا حتي ايديا اتشققوا من خبز البازين وبرم الكسكي اه اه وشوية احلام نكتب فيها بلخفية علي خوتي لين جي يوم 1 فبراير وصار هرج ومرح بين خوتي وهاديك المبايلات ماطيح من ايديهم والنت اللي دافنيين في اعمارهم لين جي يوم 15 فبراير واحد زي المريوح طار لدرنة واربعة شقوا البرور ونزلوا لبنغازي واحد ارقا للزنتان و3 ومعاهم خوي بو شيشة لطرابلس تقول اعليهم ريح وبوي علي التلفزيون اتقول مفطموم عليه وامي اتلاجي اولادي وين اولادي وين

لينا رجعة ياصحاب الخيرSuspect
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الجمعة يناير 20, 2012 10:42 am

وقفنا في امي وهي اتنادي وبيديها اتشالي وتقول احليلي وبرد حيلي اولادي ضاعو ا مني نوض يا حاج دور علي اولادك وين
وسيدي يعني بوي ايقوللها مشيت حصان سعيد انشالله معاد انتلاقه معاهم ماهم طول عمرهم دوايح متعلمين ايشاوروا فيا يخده اتسوقهم
وبصراحة كلمات ايقول فيها وماهي من قلبه
وجهه اتقول اعليه ليمونة رامضة
ليل ماجاب الليل وهو يكلم في عمي اللي في درنة ويسال فيه علي اللي صاير في البلاد واحني بين الجزيرة والعربية والقنفود اللي صاير في البلاد اتقول ماهو خاطم اعليها واحني انتفرجوا شوي و يندف اعلينا هاذك الباب وايجي فمه قي قعره وعينك مااتشوف الضي البوليس يسال علي خوتي خاصة برق الليل وسعد الايام ورواق
وناض بوي يتبعثر قي جرده شن صاير ياولاد رد اعليه كبيرهم اولادك وين
من يومين ماروحوش وكان شفتوهم خبروني هيا اتنسموا بروا دوروا اعليهم في مطرح ثاني ركبو جماعة البوليس اللي كان معاهم ولد جارنا وخش بوي يلعن ويسب وامي اتمد واترد وتنوح ياقلة صبار يصبرني وماجي الصبح لين انتشر خبر في البلاد بين الناس شنو قالك وشنو قلتلك اولاد الشيخ طلعوا جردان وامي تنادي فيا يابنتي شنو جردان وني ماناي عارفة انلمها امنين والا منين من الرد علي امي والا من بوي اللي ديري شاهي ديري قهوة والا من الباب واللي مابطل دقان مرة خلاتي وخوالي ومره عمتي وعمامي وانكفوا اعلينا من كل جهة اسمع واجري واحني علي هالحال لين ايخش خوي ابوزيد ورغاوي فمه سابقاته تي والله ياكان اولاداك الداحيين في الشرق والزنتان ما يولوش علي تالياتهم مانكون غير نافدهم برصاصة واطلع وامي المسكينة تجري في جرته يوليدي عيب اعليك ها ذوا خوتك عمره الدم مايصير امبه ليه ياوليدي في اخر عمري اتشهدروا بيا يعني الصورة صارتلكم واضحة خوتي انقسموا علي 2 سته معارضيين واربعه مؤيديين ويتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الجمعة يناير 20, 2012 1:42 pm

انمسي اعليكم بالخير ياهل الخير
وتوا اتعالوا نكملوا حكايتي مع امي وبوي وخوتي والايام
الناس لما عرفوا ان خوتي معارضين والدولة طالبة روسهم
الجيران اغلبهم صاروا ايقولوا اعلينا عيت العملاء خاصة لما مارفعناش العلم الاخضر علي دارنا من دون الناس
والبنات صاحباتي ايلقحقوا في الكلام عليا ويقولوا انتو شنو نقصكم تبو تتنمردوا المصيبة مش في الجيران المصيبة في بيتنا ونسوين خوتي الاربعة زي رجالاتهم مؤيدين و2 معارضين ماهو 4 من خوتي عزارة يعني بلا انسوين
واني وامي ايدينا علي خدنا انفكروا في خوتي الدوايح بين الشرق وبين الغرب وبوي فرصة وجت لعنده حلمه مايتحقق الا بسقوط القدافي
بعني معارض بالوراثة حتي السعي ارتحت منهم بوي قالي اقعدي في الحوش ومعاش فيه اطلوع من الاخر خايف ايخطفوني ومعاش الذبان الازرق يوصلي ويعرفلي اطريق نسوين خوتي المعارضات معادوا امشوا للمدرسة وشدوا اولادهم زيهم والمؤيدات متلاقيات ويغنوا هم وفروخهم يحرقوا في اعصاب الكنتين الاخرات
وبوي ياكل في غماده كان يتكلم ماهو في خير وكان يسكت ماهو في خير وفي ليلة كنت اني وامي نتفرجوا علي قادربوه لا بوي ميعرفش غير الجزيرة والتليفون قلتلكم رن موبايلي رقم المنجوه ولد عمي اللي في درنة
نسيت مقلتلكمش جدي متزوج 2 وحده درناوية وهذا حفيدها شوقني فيه مانحبش شبحه وجاني صوته اتقوله اعليله صوت جدي يعني عنز مخنوق الليلة الحرفة ايش حالك كنك ماتردي شنو تبي ردي كان ضربة موس في قلبه اهون منها وين سيدي يعني بلهجة درنة سيدي عمي من تكلمي يابنت هذا مواطن شنو هاتيه جاي وابدي بوي يسأل فيه اتقول اعليه محقق وما ان سكر الموبايل حتي فال لامي ارتاحي اولادك عند عمهم شوية ويخش اعلينا خالي وهو يوشوش لبوي باش امي ماتسمعش الجيش خش الزنتان ومخازن الدخيرة في مزده اتفجرت ومصراته خشت بعضها والزاوية الميدان ايعبي ويفرغ وفعدنا بين ولد عمي المنجوه في درنة ايقول اكلام وقادربوه ايقول اكلام وتلفون خوي في الزنتان اللي ايقول اكلام وحمزة ايقول اكلام وخالتي في مصراته اتقول اكلام وشاكير ايقول اكلام والمسكينة امي اللي طول عمرها ماتعرف غير خبز البازين وتطرشيق الزميطة وتروين البسيسه صارت تعرف التاتو ودوغه ووغوغه وسركوزي والمدهوني والجراد والميم ط ماهي معاد عندها خدمة غير التلفزبون من فجر ربي لين يكمل شاكير يعني امي انضمت لولادها الاربعة المؤيدة وبوي لولاده الستة المعارضة واني معمر مانبيه لكن حتي اناتو مانبيه يعني معارضة لمن يكره بلادي ومؤيدة لمن ايحب ابلادي
لينا عودة
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الجمعة يناير 20, 2012 10:46 pm

واحني علي هالحال امي اتنوض وترقد علي شاكير وحمزة وبوي بين الجزيرة والموبايل واني حتي كنت قبل انوسع في خاطري بين المعيز والسعي اندفنت بين عراك انسوين خوتي والبطانية لين جت ليلة مافيها قمر بعد اتعشينا واتحمدنا واتشكرنا ولونه ولد سيدي المنجوه متصل بعمه اللي هو بوي علي الثريا ماهي الخطوط بينا قطوعها وهو يقوله حسن انصاب في اجدابيا وبدي بوي ايمولج زعما يحكي واتنوض امي ادير انديب والا يسكت وفمه مش مهنيه وماهي غير دقيقتين بقها في وجه امي امتعة الهم بكري نوضي ياحاجة ولدك حسن ماهو معروف حي والا ميت وسكرت امي اودانها وصقتها عيطة وك علي ولدي وك ياكبدي يانجهتي القوية اسكتي لميت اعليا الناس وتقول صوت امي برق اتلمت علينا امة محمد من شرقه ومن غربه ونسوين خوتي المعارضات يبكوا مع امي والمؤيدات ساكتات علي خيرهم وشرهم ومرة مرة ايوشوشو واني ماتسالوش اتقول اعليا لدغني حنش وانتم افهموا شوية وعاود المنجوه المرجوج ولد سيدي شوقني فيه وهو يطمن في سداي اللي مايصدق يسمع كلمة ياسيدي جت في الريش فكيت من بوي الموبايل لنسمع هاالمرجوج شنويخرف وجاني صوته باك لا حر ياك لاشر شوقني فيك وفي حرك وفي شرك حسن وين وفي رمشة عين جاني صوت خوي العزيز الغالي وهو ايقولي ماتخافيش يليلة حرفة مافيا شي ياناري اعليا خوي سحنون ماهوامتع ادواوي هذه وفكت امي مني التليقون اتقول اعليها مخبوطة بجن وليدي وفتحت عاد السرينة في اودان خوي سعد الايام ورواق وبرق الليل وحسونة وطارق وين طمني رد بالكم من خوتكم راك اتسيبهم شوية ونهب منها بوي الموبايل واني انصبر في امي وجراتنا شنو بنجكي اقريب ايتباطحو فريق ايتكلم علي اخبار الجزيرة وفريق علي اخبار حمزة وشاكير وانفضت علينا هذيكه الناس وحتي انسوين خوتي لزهم سيدي هيا درقوا اعليا وجوهكم واقعدت اني وبوي وامي

مسكينة امي ياحرقة قلبها بين حسن وحسين وبرق الليل وسعد الايام ورواق وطارق اللي بين مصراته والزنتان ودرنة واجدابيا وبين محمود ومفتاح والضاوي وابوزيد اللي في الكتايب
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   السبت يناير 21, 2012 12:05 pm

وقعدنا علي هالحال امي تبكي وتجغرد ياحليلي علي اولادي يقتلوا بعضهم وهم مايندروا وكان بوي يسكت فيها شنو الناس معنداش اولاد ماهناك غير اولادك واستمرينا علي الحال بين شاكير وتنتوش وسمير الكردي لين صبح من الاصباح قال بوي نوضي يابنت لمي اللازم بنرحلوا عيطت امي ووك اعليا انسيب بلادي وين نمشي انهجو زي ماهجت الناس رد بوي وهم علي ها لحال بين مد ورد يخش اعلينا خوي الضاوي الكلاشن علي ضهره والعلم الاخضر علي راسه زي عصابة سيدهم هيا يابوي اعطيني كتيب العيلة باش انطلعك ال500

شنو اخر عمري ناخد رشوة وبدوا عاد في النق والتخوين طلع خوي وهو ايقول اقعدوا فيها والله اولادك ياكان يشدهم الجيش ماعندي دخل فيهم

والله ومعمر وليبيا وبس

وبدي بوي في الدعاوي والسب لين انبحت قرجومته وماسكت غير بعد ماسمع صوت سيارات جاية قالت امي زعما اوخينك بلله اسكتي يومي انتي وين واولادك وين

شوية ولاوينه سيدي ايرحب بشاب ياودي ماهو من دشرتنا اسكتوا ماهو كنت نشبح من وراء فردة الباب وسمعته ايقول هيا ياحاج والله ماتباتوا غير عندنا الليلة وكان ايوشوش في كلام ماسمعتاش ماسمعت غير سيدي ايقوله رجال طالعين لبوكم وجدكم

وخش بوي وقال هيا ولمونا في 3سيارات احني ونسوين خوتي وعمتي وركبت عاد اني محسوبتكم مع اللي كان ايكلم في بوي اتقول اعليه غزال والااللحية اللي مانكذبش اعليكم هبلتني هبال والثاني ياماشالله اتقول مرسوم رسم

وكانت وجهتنا طرابلس اول مرة انخشها وفي كل مرة ايخشوا بينا من مكان لين وصلنا اطرابلس وخودنا لحوشهم هو اتقول اعليه حوازة باين اعليهم منغنغين لشوشتهم وانفتح باب كبير خشوا منا السيارات و طلعوا استقبولنا ورحبوا بينا ودخلنا الحوش واني متحشمة وهبه هات يافرش وهات ياصالونات وهات ياعز وقعمزونا في صالة كبيرة وهات يامشاريب وقهواي وكل مايسر الخاطر وشوية ودخلت اعلينا بنية خشت خاطري من اول نظرة اتقول اعليا نعرفها من سنيين وبعد ماسلمت ابتسمتلي وقعمزت بحدايا

يتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأحد يناير 22, 2012 7:35 am

وسالتني علي اسمي قلتلها اعليه
استغربت لكن اتحمشت ياودي اتقولي اسمي مش ماشي مع العرض والطلب قصدي الموضة
وهي قالت اسمي ورد الخال اسم علي مسمي الله الله ياكان اتكون من حظ خوي حسونة وشوره فكرتي دايرة في راس امي اللي ماحولت اعليها عين لين البنية انكمشت في تقميزتها
مرة مرة انفنص في امي اتحول اعيونها ونسوين خوتي ايبلحقوا في اعيونهم اتقول عيون حوت ميت
المهم بعد مااتعشينا رشدة الطرابلسية والرجالة دارلهم بازين وحاجات ياودي نسمع بيها وناكل حتي فيها لكن عندهم علي اصولها
المهم شوية وقالتي تعالي نمشوا لدراي
ياحصرتي ني اللي ماعندي دار من النهار اللي افتح اعيوني نرقد مع امي حوشنا دار بوي ودار اني وامي ودار اتقعميز وخوتي الاربعة ايتمرغوا في المربوعة
في النهار ضيوف وفي الليل منامة خود والا خلي هذا اللي عندنا وسط حوش كبير وكوجينة وبيت راحة ومن الاخر ياودي تقعميزينا خصوصي في الصيف علي برا
ودخلت دارها اشهقت يااوخييني هذه دار والا معرض اتقول عليه مسلسل تركي
هو تبوا الحق حتي بوي عنده الخير والخمير لكن راميهم في السعي والبل والبقر شويه اعتطني حاجة قالتي البسيها اني الليلة الحرفة اللي طول عمري نرقد وحزام باصمتي في نصي نلبس بيجامة
يالوكان ايشفوني خوتي ايقدودني و للكلاب يعطوني
قالتي عادي هذا لبس النوم مش تطلعي بيه للناس
لبس اتقول اعليه لبس حفالي وقالتي هذا الحمام
شنو ياكبدي باين اعليهم كل مايرقدوا اديروا حمام علي الحال لوني امتقرقطة
اني نعرف الحمام من الجمعة للجمعة
ودخلت للحمام اقريب جاني الفالج معرض صابون واشانبو حتي الورد يامينتي قامدينو في الحمام
وهذوا علاش ايعارض وهم عائمين عوم
واخشيت في هاك الرغوة خود وصب اللي نعرفه واللي مانعرفه
يكبدي هذا وين حسيت روحي اتعنشت تقول عليا طائرة في السحاب ولبست اللي اعطتني لا ماخشيتش البطانية كمزتني علي كراسي صالون واعطنيني حاجة زي القهوة قالتي هذه موكا ياودي زعما اني في الذنيا والا بره منه الله غالب اعليا طول عمري بين السعي والجوابي
والدجاج واعياط بوي وندهة امي
ويتبع
الرجوع الى أعلى الصفحة اذهب الى الأسفل
dernaoy10
عضو نشيط


عدد المساهمات : 348
نقاط : 494
تاريخ التسجيل : 19/02/2010
العمر : 21
الموقع : 0928918228

مُساهمةموضوع: رد: حكايتي امغير اسمعوها   الأحد يناير 22, 2012 1:01 pm

رااااااااااائع جدا شرفتينا وانستينا بجد عندك موهبه في الحكي نرحبو بيك بيننا تقبلي مروري 0035
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الإثنين يناير 23, 2012 5:58 am

مرحبتين يادرناوي 10 ونزيدك مئة يازين
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الإثنين يناير 23, 2012 6:45 am

تعالوا هيا نكملوا خرافة ام بسيسي

تاريته ورد الخال من جماعة برة قالتلي حتي البسبور امتعها متع برة

ياعرتي عرة واني اللي حتي بلادي ماعرفت منها غير اشبير

المهم احكينا وكانت المنجوهة اتحب الحكاوي وماخلت حاجة اللي ماسالتني اعليها لين خششتني في عقل مش عقلي

وكانت ياحنة عيلتهم الكل معارضة لكن كل واحد علي فكره ياباب امتعين بره ايحسبوا فيها بالشبر

كناينهم الكل علي سير واحد ياودي بالذات ام شعر ملحسوس امفوته هلبة لين تحرقلي في ا عصابي

اوه انسيت ماناي ماحكيتلكم علي الناتو وك اجعلها ايام معاد تنعاد وين يضرب اتقوله زيد اضرب بلهجتها الطرابلسية المتعسلة ونسوين خوتي ايزقمتوا منها هي وسلفتها الصغيرة امزرقنة العيون

يالوكان مش ورد الخال والله والله العزيزة السمحة اللي بيني وبينكم اني الا عزوز بحداها ايهدوا في الجو كان ايصير فيه البطيح والدم ايسيل

ويكبدي الناتو مايقايس غير علي الليل ويبدا يصب في اكوراه وهات ياهرج ومرج واعياط والله ومعمر وليبيا وبس

والمسيرات اللي كل يوم شلاق طالع من كل تركينا وهاك المفرخ ياكبادي ياكبادي هات علي علامات و هتافات صور معمر واولاده علي الحيوط وصدور الصغار ومبايلات هات ياسمير الكردي واحنا عيلة وهذا بوها وهذا بوها والجيش ايسير للتحرير يابوشنة اهرب يايوشنة اهرب مواللك ماصارمنه نهار وليل وهالموسيقي وناس ياكبادي اتقول اعليهم مستغولة وعاد وين ايجي الليل الناس اكله امعارض والا مؤيد تلقاه علي التلفزيون هات ياجزيرة وهات ياشاكير وهات ياراي وهات ياحمزة ماهو حمزة ابدي نجم الشيابين والعزايز وقادربوه المراهقات والنسوين وشاكير اللكل واقف وامقعمز اتقول ساحرهم واهويلة هبلت التريس في جرتها بباروكتها توا ياكبادي اتقول اعليها منفوخة وايقول سمحة تيه تيه تيه الناس انخبلت الزين ابدي عندهم شين وبعد الساعة 2 يبدأ الناتو وهاديك الرواشن اللي تنهز وهاديك البابان والصغار والكبالرخاشة بعضها وبعدين ابدي قطغ الضي وابدينا انتلجاوا من الصهد

وورد الخال طايرتلها من النت وفي يوم امقعمزة اني وهي اخدت تليقون واتصلت ولويتها اتكلم اقولوا اسكتوا ساكت احمد الشاطر ورب العزة كانت حمفانة وهي اتقولها ارجوك ايكفي مذيعين الداخل معاش اتقولوا علي شعب ليبيا جردان والاغنياء الحقانية في ليبيا فلوسهم مش من معمر والتسيهلات وياودي كان رده موافقها وقالها اني راني ماقلتش جردان علي اهلي المهم هي كلمتين ورد غطاها

ورد الخال علي صغر سنها اتقول في كلام ياكبادي حتي الشيابين ايخافوا ايقوله ومين انقولها منين عرفتي كل هالشي اتقولي بوي وتسكت ياودي حتي اني انتبكش ومعاد نسالها علي شي ايحرك مواجعها ا

يتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الإثنين يناير 23, 2012 11:00 am

من الاخير ياودي رغم الدنيا خاشة بعضعها لكن اتقولوا اعلينا ماشين في زردة يالولا كان مش امي مرة مرة اتسبح ادمعاتها

والحاجة الكبيرة اتصبر فيها ماهو كنا زيك ياصاحبتي وسعي بالك وان شا لله مايصير غير اللي رايده المولي

وبيني وبينكم ملحوسة الراس يودي كنتهم ادير في ماكلة ماتلقي روحك غير ورياقتك سايلة وهات ياشاهي بالعالة وهات يلوز وياكاكاوية وخبزة فرن وفطيرة ويااسفنز وافتات وكل مايمد الكرشه قائمتين واني محسبوتكم قلبي ايرف كل ماينادي اللي اتقول اعليه اغزال ورد الخال تماهوا ورد الخال شادته علي البكي من يوم اللي تطلعوا اعمامها للزنتان ومصراته هيه اني وين وهو وين وقعدنا علي هالحال بين هناش مانسمعوا حاجة من هكي والا من هكي وقعدنا انشيعوا في اعيوننا بين اللي ايقول حررناكم واللي ايقول طهرناكم ومعاذ عرفنا ارواحنا امطهرين والا متحريين

وفي يوم ياكبدي ينكتب في التاريخ هو انكتب وفات اطلعنا لصرمان اني وورد الخال وعمتها ماتشوف حوشها وكان رمضان وصلنا وارمينا لوح هالشربة علي النار ودارت ورد الخال بوريك واني وعمتها واتينا السفرة ياودي امورنا حايسة في بعضها وناكلوا بلا نية لين رن الهاتف ولونه عم ورد الخال ايقولها ردوا بالكم تتطلعوا من البيت رانا اطلعنا من الزنتان واجيين صرمان ياودي اسنوني ابدوا ايصقوا في بعضهم وود الخال خشت في الفراش وانكمشت فيه اتقول اعلبها عيلة وعمتها فاتحة التلفزيون اللي هو في وادي والواقع في وادي وشوية دق الباب طلعت المرا وسمعنا صوت اوليد ايقولها يابلة قالولك هيا شوية وجتنا قالت سكروا الباب اعليكم ولد الجيران مات شوية وانجيكم وتنقز ورد الغزال اتقول اعليها صاروخ والله مااني قاعدة ومشينا الوليد مات في دخلة الزنتان علي الاطراف والناس في رمشة عين جت من كل مكان صراخ وعياط شويه وقالوا الزنتان خشوا المجرم الخويلدي اللي مانتمنا غير يحرقوه السفتول وهو حي هرب وابدي الرصاص فوق روسنا والناس مش عارفة وين تمشي اللي هرب لحوشه واللي قعد في الوفاة واللي يكبر وماتسلوش و شوية وصارت عيطة اخري قالوا راجل ايلم في اصغويرته بيجيبهم لجدودهم جاته رصاصة خدت روحه وخشت الذنيا بعضها وطلعوا المعارضين وسيطروا وروحنا للحوش وجي 3 من اعمام ورد الخال كانوا نازلين مع الزنتان ورد الخال اتقولهم ماتقتلوش الناس وبو لحية طويلة ايقولها ماتخافيش واقعدنا في الحوش والليلة الثانية قبل مانرجعوا لطرابلس الساعة 4 كيف انوض في ورد الخال ببش تشرب اني كيف ارميت الميه في فمي وابدت الميم ط زي القلية والرصاص واطلع عمها ايقول اسكتوا ياودي قعدنا في لطف الله نايضن للصبح اتريته كانوا جايين بشدوا واحد ومع الساعة 10 قال عم ورد بو لحية هيا ارجعوا لطرابلس وركبنا وهادك الميم طا اتقول رعد تضرب في الهواء مااتطبتل وما اوصنا لين ماخلا ربي فينا ماعطا وخش الجيش للزاوية اللي المؤيدة ايقولوا جيش والمعارضة ايقولوا كتائب وابدي الجراد علي الزاوية وانقطعت المية والضي بالايام والفريزات دابت والثلاليج سخنت ايام انشلله ياودي منتمناها حتي لعدو وفي يوم 20 رمضان طلعوا اعمام ورد الخال مع المغرب ومعاهم شباب زي الرز وبدوا ايكبروا والنسوين اتكبر وا اتخلطت الذنيا في بعضها طرابلس اتطهرت وبدي السلاج القوي ايترشق في السمي من كل التراكين والناس تتجارا في الكيايس و اتخلطت الذنيا في بعضها وقالوا امعمر وادراريه هربوا وهجمت الناس علي باب العزيزية شي ماينحكي في سطور اللي ايكبر واللي ايرقص واللي ايلم ماهاي عاد مقيولة تجار حروب وبدل من شعار احنا عيلة وهذا بونا ماتسمع غير معليشي شفوشه

و ياناري علي امي واولادها الاربعة وخاصة قاصة علي خوي الضاوي وابوزيد اللي مقطوعة اخبارهم وكل ام مفجوعة في اولادها و2 يوم العيد روحنا لحوشنا بعد ما ودعت ورد الخال والعويلة اللي كنا معاهم ويتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الثلاثاء يناير 24, 2012 8:11 am

ورقينا لهذاك الهفوف اللي ساكنيين فيه واحني امروحيين ايوه اتقول علي البلاد يوم الحشر سيارات علي اسلحة علي تفتيش ويا كبادي ولد خوي عاد يحساب الذنيا زي قبل وين يشوف ناس في ايديها اسلاح

ايقول الله وعمورة وليبيا منصورة

و سيدي ايعيط علي امه دسي فرخ النم لوطة ياكبادي واحني انقولوا ربي يستر غير نوصلوا سالمين وشوية ولونه خوي سعد الايام راكب في سيارة اتقول من التخربيش اللي اعليها سبورة مدرسة وهاذيك الميم ط متنقرة امعاه ومع 3 من ارفاقته

وقفونا وابديت امي وين خوتوك يامنجوه في طرابلس يامي وهاني لحقهم

نسال فيك علي بوزيد والضاوي

باهي يامي غير اهدي

خوتك ياوليدي دورهم ماتخلوش العرب تضحك اعليكم

رد اعليها واحد اتقول امه متوحمة علي راس جمل

ماتخافيش ياحاجة مادامه مش قاتلين ماايصيرش ليهم شي وهذا شنو حرك اشعيره اتكلمت مرات خوي الكبيرة اللي كانت مالصقتني علي باب السيارة لين النفس اقريب يطلع من اوذاني

المهم امشينا لين اوصنا الحوش

وشدوا عندكم السعي اتقول فصة ملح وداب ودار الخزين لاسكر ولاحشيشة ولازيت

وهاذيك البيبان امفتحة

واللي هظا واقف ايضرب اخماسه في اسداسه

واللي مايقدروا اعليه خصوصي الفرش موس احسانة ويشلوطوه

وقعدت ماني منجوهة بكري في تسيق الحوش وغسل المنادير والفراشات جاب ربي غير ماعندنا اللي ريته عند ورد الخال كان هذا غبرت

وطيبت مرات خوي الصغيرة لوح مكرونة كشيك حسيته وكشيك ماحسيته من تجميط امي

وفي الليل ارتميت علي المندار اتقول اعليا اخويت من دهك النهار

وامشيت فيها للصبح

والصبح بكري اعجنت لوح ادقيق درت الفطيرة وارميت الشاهي علي المنقل بعد مابوي جاب باكو من دكان الحومة

واتلمدوا اعليا صغار خوتي يبوا الفطيرة

هو هظا امهاتهم متمرقدات واني انوكل سحقة المفرخ

كان نبيهم راني مدايرة اسداهم

يتبع

الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الثلاثاء يناير 24, 2012 10:23 am

اني عارفته النهار احرف من صبحه

اصبروا وانتم اتقولوا اعليكم ملقفين

المنجوه عندي ولد سيدي مواطن خاش في الذنيا تزحليق

كيف وتيت روحي نبي انكمل حكايتي لين ظهرلي زي بو فقاق

ماايشوفني كاتبة كليمة لين يلقطها مني اتقول اعليه مخطاف

اخ خانب المخانيب مخلا شركة تركية ولاهندية ولاكورية الا وقال شنو درتوا يالولين يكبر من تركينة ويخنب من تركينة بو عين اتصب في عين

يعطيك اطغين ايخادك اعليا انجغرد اعليك ايامات ونسكت

وتوا سامحوني راهوا هالمواطن رقالي الزيت وطيري افكاري

طير اعليه عقله هظا وهو يشبح واحد علي 10 زعما كان 18 علي 19 وين بيصبح صبحه ليل ماجاب الليل وهو كندرته في امخابشه ويطوف بين شارعين ودردوحة لا مخلي ساحل لا بلاد ايجبه علي الناس باش يقروا تخربيشه واللي مايندري ايقول اسبول
الرجوع الى أعلى الصفحة اذهب الى الأسفل
الغزال الشارد
القلم الذهبي
القلم الذهبي


عدد المساهمات : 1773
نقاط : 2097
تاريخ التسجيل : 12/07/2010
الموقع : هنا وهناك

مُساهمةموضوع: رد: حكايتي امغير اسمعوها   الثلاثاء يناير 24, 2012 2:08 pm

يوميات مواطنة ليبية

توا اعلاش هكي ماكمالتيش لنا الحكاية

ماذنبنا نحن ان كنتي زعلانة من ابن عمك مواطن
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء يناير 25, 2012 7:14 am

صباحك بلخير ياغزال شارد بين البرور والبحور

البارح ماهو اخيتك وصلتني قوز قوز من المنجوه ولد سيدي

لكن الحاضر يقول للغائب ايطير ايجنح ويرقا وينزل مانه عارف راسه من رجليه يصول ويجول ايحساب روحه غومة تيه تيه عليك يامينتي

وتوا تعالوا نكمل احكيتنا الناس ياكبادي كلت بعضها ماتغير شي قبل البوليس يجي ايرفع في الناس اللي ماتبيش معمر وتو المجلس مداير نفس الطبيخة كل يوم ايخشوا حوش ويشدو واحد هظا ايقولوا كان يخدم في الداخلي وهظا من اللجان الثورية وبرا علي هالكلام وبدت الناس اللي ماسكين دراريها تغلي وتموج زي الحكاية الاولي من يمسكوا جماعة العهد الاول وراهوا ياكبادي حتي التلفزيون غبر في الذنيا خوف الناس ليقولهم يوكان ايخشولك المصراته والشراقة ايدبحوكم ويقطعوا سامحوني علي ها الكلمة نحكي اللي صاير ايقطعوا ثديان انسوينكم بعد ماايدوروا فيهم البطال ومن كثرة ماجيبوا في هاك الناس اللي تقول قطعت ودبحت وحرقت ناس خافت المنية ولاالدنية

وعاد اني محسوبتكم مرة نمشي لحوش خوي سعد الايام اللي مراته مصراتية ونتفرج معاها علي قنوات مصراته والحرة والززيرة ومرة نمشي لمرات خوي الضاوي العجليلة وتنفرج معاها علي القنفود والليبية ومرة نمشي لحوش عمي نهدرز مع بنويت عمي ومانتكلمش علخاطر سداي وصاني انتبكش ماهم مؤ يدات لين امفوتات معندهشم الروح مع امعمر معمر بس وعمي الزوام هرب لتونس هو ونسوينيه ودراريه وسعيه وعمي الاخضر هارب حتي هو للزنتان اخضر هارب من الاخضر وعمي الجيلاني ساكت علي خيره وشره وعمامي الاخرين واحد في درنة اللي قلتلكم عليه بو المنجوه مواطن وواحد ساكن في بنغازي واحد في مصراته و3 بايعين السانية وعايشين في اطرابلس ومنكلموش احني وياهم تي ماهو متعاركين هم وسيدي علي ورثة جدي

ومرة انقعمز مع امي وتقعدوا نسمعوا في عراك نسوين خوتي اللي كل عشية ايحوا يشربوا بحدانا الشاهي وبدل مانهدرزوا زي الناس هدرزة سمحة حاشكم ماتسمع غير صفتك نعتك حلك تركك وفي يوم مرات خوي الضاوي كانت اتقول لسلفتها اللي زيها خليها في عمامها ادشش هاليهودية ياودي ويركبني 90 جن من هالكلام الاعوج والله ماذهب شيرة خوتي غير انسوينهم ماتطقتش حد ايقولي علي مرات خوي المصراتية ايهودية مازال اهل مصراته ردتهم ايهود مشقلتلكم التلفزيون املخبط الحكاية توا عاد الحاج الطيف وعبدالمولي اللي ياما جونا واكلوا عندنا البازين المعجون وياما احني مشينا ليهم وكلينا عندهم الخير والخمير واني كاني انسيت ولايمكن ننسي العجة المصراتية اللي مايعرفنها غير انسوين مصراته ويكبدي يجري ولد خوي لامه يومه الطحلوبة قالت علي خوالي ايهود وتجي فازعة من غادي ويبدأ فيها الرديح غير ستر ربي فيسع محزها سيدي ماهو قعد هظا صنعته ايحز في كناينه وخوتي داحيين بين ورفلة وطرابلس والضاوي محبوس عند الزنتان ومفتاح امقعمز في مربوعته ماعنده خدمة غير لعب الكارطة هو وجماعته وراحت هاكا الهتافات والمسيرات وبوزيد هرب لتونس

اهو المهم امي ولت وارتاحت شوية بعد ماكلمها خوي من الزنتان ورواق من القبة اللي قالوا مجروح في ساقه ويوم قالي سيدي هيا يابنيتي سيدك معاد عنده جهد بري معاي للمصرف اهناش ماتحصللي هوكا القروش وامشيت يامضانيني ونلقي هاك الزحمة عزايز وشيابين ورجالة وانسوين اللي امقعمز واللي واقف واللي ايسب واللي ايداعك والميم ط منصوبة والرشاش علي اكتوف الثوار ماقدرنا انخوشوا في ها لدنيا وقعدنا امقعمزين في السيارة ولونه صار فيها العياط المدير بطحوه بطريحة شنيعة قالك ايلقوه ايمرق في الفلوس لجماعته من الباب الخلفي وبدي فيها الكلام البخيض اللي ايغطي منه الشيطان وجه شوية ونخص سيدي السيارة وروحنا وهو طول الطريق ايسب ويلعلع ووصنا للحوش ولويتا هرجة ومرجة في حوش عمي الزوام قالوا روح وياودي في حال يلطف بيه المولي وعرفت البئر وخطاه من سمعت بوي ايقوله ضحكوا اعليك التوانسة وخدوا رزقك ياولد باباي
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء يناير 25, 2012 10:39 am

مسائكم بلخير يهلنا في الشرق والغرب ومن قبلي ومن بحري وحتي النواحي الاربعه

المهم جت العرب متطير السوء علي عمي الزوام اللي المسكين شاف في تونس ايامات حرف امغبرات

ودرنالهم اني ونسوين خوتي العشي وبعد ماسهرنا عندهم روحنا كل واحد انخمد في داره

واني ارتميت علي هاك المندار اللي صار رفيق ليلي واتقنفدت في فراشي للصبح والصبح زي العادة والعوايد نوضت توكلت علي ربي وارميت السفنز وطيبت الحليب والشاهي واعطيتهم ياكلوا ووزعت علي هوكا العوالي الخامدات ا نسوين خوتي السنفز والله يالولا خوتي ماضاقوه

ونوضت خوي حسن وطارق اللي مروحين من يومين من ورفلة ومشيت وكلت اللي مازال من سعي بوي اللي نصفه راح وعقابه القوه في الوادي وشوية لونه حوش عمتي اللي سماي اعليها جاينا ونصبت عالة الشاهي وناديت علي المنجوهات نسوين خوتي وكيف ارميت طبيخة البازين علي النار لين ابدي خوي حسن وطارق ايكبروا شنوفيه شدو الطاغية وتلمينا علي التلفزيون بين امصدق ومكذب

وشوي وقالوا مات وطلعت الناس السيارات اتبيب و مرات خوي المصراتية صكتها زغروته والسلاح ابدي ايترشق وناس بين فرحان ومصدوم وزعلان ونسوين خوتي المؤيدات وحوش عمي يتباكوا وماصارش من الغدي وخوتي طلعوا وياودي حتي بوي المعارض معجباتش طريقة القتل المهم وخوي طارق ايقريب ايفر فران ويقول لبوي يستاهلها وقريب ضرب مرات خوي الضاوي علي هالموضوع شباب دمه فاير قالتها امي وهي اتبعد فيها وجاني صوت بوي زي الرعد نوضي كملي الغدي شنوبياكل راجل عمتك توا اللي يسمع ايقوا غير هو اللي بياكل وين عاد بيلقوا شغالة بلا راتب زيني المهم اخبزت البازين اللي كلي كلي واللي ماكلاش مادورته

ومعاش فيه دوة غير القدافي وكيف قتلوه ومن قتله

وبعدين نست الناس وهاذي الذنيا وتو الناس اعطيها غير شنو تاكل و شنونصرف

وياما جماعة استغلت الموقف اللي ماخلا شركة اللي منهبها ولامشروع حتي سيارات حاشكم المجاري رفعها اللي باعوه باعوه واللي رقدوا اعليه رقدوا اعليه
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء يناير 25, 2012 2:20 pm

المهم هانا قاعدين انوضوا وانرقدوا زي قبل زي التالي

وخوتي ايتلاهدوا علي الميم ط اتفول راكبين علي جوادير

واني نجري وراء جرة هاكه السعي الصقع واخد فيا حصة وعياط خوتي اللي اتقولاتريبيه نهار ماجاب النهار وليل ماجاب الليل وهما يبلعوا

ونسوين خوتي قلت هرجتهم ومعاد تسمع غير توا انشوفكم شنو اديروا فيها هانا نتفرجوا وخوتي المؤيدة سكتوا وبلعوها في صدورهم وبوي خاش في موال كبير كل يوم وهو يلبس زبون ويصب من هاكه شيشة الصنة اللي ايسمي فيها ولد سيدي مواطن البنة

وامي حاس بيها الدجاج الاسود وخشلها الوسواس حاشه السامعين تحساب بوي بياخد اعليها ضرة ياكبادي حتي العزايز ايغاروا وماسكتت لين قلتلها يامي بوي بيخش الانتخابات وهذه ماهي محتاجة نشرحها امي تعرف الانتحابات يعني بازين وكسكسي ورز ولحم وامشاريب والخير الكل ماهي عاد املحقة علي جدي وخوتي اللي كانوا في مصراته و ورفلة كل يوم والتالي وهم عزايم مرة جاينهم ثوار من يفرن ومرة من مصراته ومرة من صبراتة و مرة الزنتان تي ماهو خوي محمود طلقوا اسراحه وهات يافوشيك ايلعلع مع كل جية ومشية وليلة بعد ماغسلت اماعين العشي ةخشيت بنتمرقد رن اعليا التلقون

يتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الخميس يناير 26, 2012 6:38 am

صباحكم بلخير ياهلنا من شرقا ومن غربا والوفقين واللوطيين تيلا مايمشيش فكركم لبعيد الوطيين عرب امقبل يعني الجنوب

قبل لاانخشلكم في حكايتي نبي نبعث برقية لولد سيدي مواطن منجوه المناجيه

مفجوع المفاجيع البارحة يالوجوه الطيبة كيف خشيت في فراشي ولونه رسالة منه ايقولي فيها هالفندلوس المندلوس موله الدجاج والفلوس يحسابني زيه شوره ياباب امترعب في قهوة من قهاوي وسع بالك ويجخور في ادجاجة بسنونه المسوسات ويقولي فيه توا امقعمزة راك تاكلي في دجاجة بروحك

هالمفجوع يحسابني زيه وهو زي التريبية ياكل وماطلعة اعليه حاجة اتقول اعليه ياكل بالدين

تاكي تاكي يامواطن تاكي تاكي

المهم تعالوا انكملوا حكايتنا قلتلكم رن التلفون ولوتها ورد الخال جاني صوتها اتقول اعليه زبدة سايحة بنات اطرابلس ياخال

وعرفت منها انهم يبوا ايجونا

يوالله ليلة سعيدة اعليا حتي كان سماي ليلة حرفة

وابديت انوتي وانرتب لين ياخال وان عشية ابيهه في سيارات جايين اتقولوا اعليهم حمامات يداجن ورحبنا بيهم وفرحنا بجيتهم والرجاله دخلوهم لمربوعة خوي سعد الايام والنسوين لحوش خوي الضاوي تيماهو غادي عاد الجلسات والدنيا اللي تتباقس

وخدوا انسوين خوتي عبايتهم من اعليهم اتقولوا عبايات مرصعة بالياقوت وفرشنا العالة وجبنا البشكتي والفطيرة وخبزة الفرن والحلوي وبعد شويه جابوا انسوين خوتي سفر اعليها سواني القلايا عادة ياخال لازم منها قبل العشي نقدم للضيف الكبدة والحم المقلي واني وورد الخال قمزنا بحدا بعضنا وهدرزنا ايوه شوركم ماصدقتوا اسرار خاصة غير قابلة للنشر

وبعدين جابوا العشي والمشاريب والخضرة وهاالصغار اتقول اعليهم جديان ايناقزو بين غادي وجاي كان مع ورد الخال جداها السمحة ومرة عمها ملحوسة الراس والثانية ام عين زرقاء والثالثة ام الشعر كاريه

يانجهتي ني اللي مايخلوني حتي انقص من شعري نتفة لين مصني وخلاني مسلوعة وبعد ياباب السهاري علي راي مواطن الكناين قعدوا في حوش خوي الضاوي واني وورد الخال وامي وجداها امشينا لحوشنا وخشينا وضحكت قتلي ورد الخال علاش اضحكتي وك يوكان يسمع صوتها خوي حسن يابات ليلتها في ليلة

قلتلها ماعندي دار زيك بروحك لكن عندي قليب احنين فرحان بيك هلبة وحتي ان كانت جيتي مني جوبة وافرشنا واتغطينا ياكبدي هالبنية اتقول ماهي منهم وابدت اتقول لامي احكيلي حكاية

واحكتلها امي علي غومة وسوف وعسكر لين امشيت في نومة والصبح نوضنا توكنا علي خالقنا وامشينا لحوش خوي ولقيت انسوين خوتي ايوتوا في الفطور وافطرنا وبعد ماتحمدنا وتشكرنا نوضت باش انوكل السعي والدجاج قاتلي ورد الخال بنمشي امعاك وجت امعاي وبديت تجريلي وراء الدجاج والسعي اتقول اعليه هايدي امتعة الرسوم واني نضحك وبعدين امشينا وكنا البل وشافت احصان ياخال نحسابها بتخاف منها امشيتله وشوره القلوب عند بعضها حتي هو ماخافش منها قلتلها يابنت شورك اتحبي الخيل قالتي عندي خيل في روما
ايه سكن روما لو كتفوني بالحديد انحله ولو علقوني في السمي نصوله
وقتلي شنواسمه قلتله ماليشي اسم قالتي كيف لازم ايكون عنده اسم قلتله سميه واني انوكل فيه قالتي انسميه شموخ وروحنا للحوش ولسان حالي ايقول امريض ياحمد بابك حار دليله من بنت جاره وجايرة وجميلة

حاير شوره من بنت جاره واعينها مقروة

يتبع
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   السبت يناير 28, 2012 12:03 pm

مسائكم بلخير والخمير ياهل الخير ياهلنا
وصلنا في مروحتنا من الخيل وتوكيل البل والسعي وخشينا لحوش خوي وليقت الجماعة امقمزين علي عالة الشاهي وقمزنا وشوية والجو اتغير والسحاب غطا السمي وقالت امي اليوم يوم بازين يانسوين ضحكوا وقلولها مازال ياحاجة عل الغدي وياودي اني مرة مرة انقول ياساتر انشالله غير مرات خوي الضاوي ماتقعدش اتخش في السياسة و بحورها وتبدأ اتعوم قدام الضيوف ويبدم ايتناقرن المنجوهات المهم بعد ماتغدينا قلت لورد الخال تعالي انروحوا للحوش وامشينا
عاد نبو نحكوا علي راحتنا وادخنا دارنا وبعد ماقمزنا قالتي ممكن تعطيني شنطتي واعطيتها الشنظة وشوية يا خال طلعت ياكو ينفتح وايسكر وابدت تنقر عليه اتقول اعليها زرزور قصب
قالتي هظا نت
يااني نجهتي لمن جت لانعرف اباد ولانت المهم ورتني ذنيا ياباب واني امقعمزة في مكاني ونبلحق في اعيوني اتقول اعليا بومة
وياكبادي ابدت اتكلم هي وعمها اللي لندرة واصغاره والمرا واني مستغربة وامحتارة
ونفكر في عمري اللي تعدي بين الداموس والمسده
وبعد ماتفرجنا ولينا لحوش خوي وجو حوش عمي الزوام وشدناهم للعشي وابدوا بنات عمي وامرات الضاوي ايحكوا فلي كنت خايفة منه
واحد ايقول امعمر في النيجر واحد ايقول خميس ايعالج بره
ماضحكني غير رد ملحوسة الراس مرات عم ورد الخال وهي اتقول اكيدة يركب في قطع غيار
وياودي لولا امي كان الوحي زاد والهرجة كثرة
وبعد ماسهرنا خشينا فراشتنا وكمنا التهدريز واحني تحت غطانا وكملت امي لورد الخال حكاية غومة وموته وعند الصبح بعد الفطور روحو اضيوفنا وودعت ورد الخال اللي خشت خاطري ونسيانها ياودي محال وخشيت اني وامي وسيدي واسكرنا الباب ماهي مقيولة ما وراء الباب حباب
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   السبت يناير 28, 2012 2:47 pm

مساء الخير علي كل السامعين واعذرونا ان كان لقيتوا حرف ناقص عاد انتم اصحاب المفهومية وتعرفوا قصدنا ومقصودنا

محسوبتكم مواطنة هذا حالي كل يوم انقول خير من يوم

لكن ياكبادي ماقابل

اليوم نوضت زي العادة والعوائد ولعت الكنون وارميت البراد وعمرته بلشاهي والسكر واقربت سفرة الفطور و ناض سيدي ايبرم في شواربه شور الكانون وامي قعمزت اتقرب في البسيسة لسيدي الذنيا صقع واسميطري بيني وبينكم غير ماتقولوا لحد طالعة نكته قالك ياباب شوره امعمر كان امدفي الشعب الليبيي ومين غاب جانا اللي كان مدسوس وعاد راكم اتقولوا لحد وردوا بالكم ايسمعوكم السرايا جاكم عامكم والبلح بعدين من الوريد الوريد للوريد

وتاكي تاكي ياسرايا تاكي تاكي

المهم واحني نفطروا ولونه خوي طارق ايقولي هاتي ورقة الافادة راهو ياحرفة فيه تعيين

قاله سيدي وين ومن قالك قاله

اسمع ياطقل مااغير المدرسة اختك مااتعيين

وك ياكبادي ديما سيدي وقفلي في حنزرتي

المهم وزاد قاله ولدك محمود كان بيسافر للاردن ايجيب جوازاه الليلة لونه غادي تيه تيه من قال خوي محمود يقعد تحت رحمة خوي طارق مولي الميم ط والرشاش المسقم مايدوم حال كان حتي خوي محمود بلاكشن والعلم الاخضر من مسيرة لمسيرة ومن حفلة لحفلة جاته اقريبة وفي الريش حبسة الزنتان المهم توا علي راي امي تعاللها كيف مااتجيك المهم ياباب الجماعة اسمع واجري علي الاردن اللي بطنه واللي سوسته واللي عقيم واللي غير دهوراي الكل طارن وناس من شرقا ومن غربا اتقول اعليهم اجراد هاجم هحوم شين ياباب ويتبع

حان وقت النوم من الاخير النوم ولاالدبلوم
الرجوع الى أعلى الصفحة اذهب الى الأسفل
اليسار
عضو نشيط


عدد المساهمات : 228
نقاط : 230
تاريخ التسجيل : 13/10/2011

مُساهمةموضوع: رد: حكايتي امغير اسمعوها   الأحد يناير 29, 2012 2:16 am

0025
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأحد يناير 29, 2012 12:11 pm

صحيت علي التحية
ونقولك غير تعالى انيدرولك شاهي بالعالة
ايه كيف حلكم ياهلنا اليوم الخير كاثر المطر اتصب وفطورنا عصيدة بالرب
ايه علي ايام ازمان واحني انغنو يامطر صبي صبي
يامطر ياخالتي صبي علي قطايتي
قطايتي مدهونة بزيت الزيتوته
يامطر يابشباشة صبي علي حوش الباشا
والباشا ماعنده شي غير لحمة الششي
اليوم ا نحبسنا في ليادة الحوش وخوتي تجمعوا معانا علي العالة خوي بو قطاية رواق وخوي بولحية واصلة لسرته برق الليل وخوي سمح الطلة حسن وخوي المتلقلق طارق وخوي الضاوي وامي فرحانة اولادها مجتمعين وسيدي يبرم في شنابته ويضحك وهو ايقولي يا بنت جيبي خلاصك واظفري لخوك راسه اللي رايح كسبيب الخيل وامي تقوله بلاش تقنتير علي ولدك ياحاج عاد خوي رواق ياهل الخير بو شعر كي سبيب الخيل كان من جماعة عبدالله عزام وبعدين اتحول لبن لادن يعني قندهاري صوت وصورة لكن عاد اني انعزه وديما اني انقوله احكيلي علي افغنستان وجبالها و ظراهرها
وخوي برق الليل حتي هو من جماعة كابو ل كانوا ياباب في الجبهة يعني لايعرفوا علم اخضر ولا احمر ولااسود مايعرفوا غير الراية السودا بيني وبينكم نلقاني مايلتلها
وخوي الضاوي امتكي ويناشب فيهم خاصة قاصة طارق اللي ماعنده الريح وين ايدور مايعرف غير اللهيد علي الميم ط اتقول مفطوم عليها لكن عاد مهما ايتناقروا خوت يابا ب وياخاش بين الظفر واللحم
وخوي حسن ايغني ايحمق في الضاوي نحن هنا
واكتب علي الورقة يالقلم القائد علي النصر امصمم
والضاوي امتربع ايجغم في الشاهي ويقوللهم يلولا الناتو كونتوا ماتقدرونا
وسيدي يضرب علي القوي وهو ايقول شدوا الهمة ياولاد ورجعوا مجد جدكم راني سيدكم خاش علي الانتخابات درازي
خوي برق الليل ايقول قال الله وقال الرسول لاانتخابات لادستور نبوها خلافة
وسيدي ايحمق منه وايقول اقلب عليا وحهك يابو لحية بره لجماعتك في كابول وخوي حسن ايقول ولايهمك ياسيدي تريسك عاصرة ماتكون غير انت البي علي المنطقة كلها وعاد يبدأ سيدي يبرم في شواربه وهوايقوله لكن ايبله هالمركز شوي وشويات
وبازين واللحم علي المفاصل
وك جاك الشقا يامواطنة مانخلقتي في هالعيلة غير للكد والنفخ اتقول عليك خادم من خدم جدي
قالها خوي طارق وهو ايساوق فيا ياباب
واحني علي هالحال لين رن التلفون خوي محمود من الاردن ايتكلم وايقول وصنا واحنا بخير
رفع معاه مراته و سعد الايام باش ايسهلهم الامور وفتاح وامراته قالوا فيها بعج وهو بسلامته عنده الزكمة
ياقاعدي غير اني لامن يرفعني ولامن ايحطني مادام سيدي وسعيه في جرتي
ونوضت انتكابا واحولت امعاين الفطور وخشيت للكوجينة انعول علي الغدي يادايا من سيدي وخوتي دي
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأحد يناير 29, 2012 3:38 pm

مسائكم بلخير يالوجوه الطيبة ياهلنا البرد ياخال اينخر العظام سميطري شين
ياواقي علي الشيابين والعزايز
ديما سوال في خاطري جوال كيف المذكرة اللي يتحاوسوا بين الطوابي وتحت الحيوط مابسقعوا وهم عارين الراس ونحنا الاناتي انغموا في روسنا والبرد لحقنا لحقنا
المهم زي العادة المعتادة مواطنة محصورة بين الكوجينة والدار والسعي
لاتعيين ولامدرسة زي البناويت اللي يتهادن انشوف فيهن كل صبح وكل عشية
وحتي المنجوه طارق خوي كلامه علي التعين طار مانزل ياهلنا
واليوم عند العشية قعمزت زي قبل مع امي وقعدنا انكسرن في الخبزة للسعي اللي مايشبع
ومرات خوي سعد الايام اتوتي في حنة الميلود
مبروك عليكم وترسم وتعاود في نقشة قالت لقتها من الموباين علي قولة امي
ولاتحشمت ولااتسحت وقالت انمد ايدي معاههن انساعدهن جيل مايستحي
قالتلي امي العزوز والحمي مكروهات يابنتي
وحكتلي علي كنة كانت اتغني وراجلها امتكي بحداها وهي تقول الحمي حمة والعزوز سخانة وانشالله ربيع العين يشتاقها الحنانة
رد عليها هو وقالها الحمي جنة والعزوز توبة وان شالله ههههههههههههههههه
نكملوه غدوة ان كان عطانا ربي عمر وتوا اتبقوا علي الخير ياهل الخير
الرجوع الى أعلى الصفحة اذهب الى الأسفل
اليسار
عضو نشيط


عدد المساهمات : 228
نقاط : 230
تاريخ التسجيل : 13/10/2011

مُساهمةموضوع: رد: حكايتي امغير اسمعوها   الأحد يناير 29, 2012 6:22 pm

وتكون طويسة بالكاكاويه وطويسه باللوز
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الثلاثاء يناير 31, 2012 8:52 am

كيف حالكم ياهلنا
امغير ردوا علينا خيركم سكتوا يالندرة حايين ولامتو
ياودي يااخونا اليسار انت غير صفي النية وتعالي واللي تبيه ايصير
امس يالوجوه الطيبة سيدي قال لخوتي ماتقولش خيركم مااتطلعوش في اختكم يضربها حتي الواري
ايوه سيدي حس بيا وعرفني اقريب انفد من حبسة الحوش والداموس
ناض خوي برق الليل قاله ماعندناش بنات يطلعن
وسكته سيدي وانت شن حرك شعيرك ومن عابي اعليك
بر دور اجمعاتك وشوفكم تركينة افتو فيها
حاول خوي حسن ايهدي من هرج سيدي وخوي
قال اني نرفعها وهيا البسي شلاتيتك واخشيت البست زي البناويت وجيت طالعة ولاقيني خوي رواق وين النقاب وك شنو وقالي ماتطلعي الا بالنقاب وصكيتها عيطة خلت سيدي اينقز من فراشه اتقول اعليه عزري ومنيين لقاني نبكي قالي يخلع فرايسك شنو فيه
قتله ولدك قالي اتنقبي
طلع سيدي وقالهم مادماني حي ماحد ايكلم مواطنة واللي مش عاجبه ايقلب زومته
واركبت السيارة بعد ماحصلت تمرعيشة من خوتي
المهم وامشينا ياخال للسوق وياسبحان الله اتقول امة محمد عليه الصلاة ووالسلام اكلها طالعة من بيوتها
ايوه ويقولوا ماعندناش فلوس
المهم خشينا للمحلات وياباب اعيوني اتخا لفن من الدبش اللي امعلق واللي علي الصناديق
وقالي خوي اشري اللي خاطرك فيه واشريت لروحي ولامي وحتي سيدي اتفكرته يفانيلة صوف تركي راحت اعليه ايام الصوف الانكليزي والكشمير الهندي وعاد استغليت وقفة خوي بعيد عني واشريت حاجات البناويت الخاصة ودستيها في شنطي باش مايشوفاهش وهو يشبح في اللي شريته واطلعنا ووقفني جنب قهوة واشرلي خبز ة طابونة وحكة اعصير
اكليتها وقلت ماحلا زيتها وروحنا ونلقلا خوتي قدام الحوش امقعمزين يستنوا قيا اتقول عليا هاربة مع راجل ولكن مايقدروش ايتكلموا ماهو سيدي وين سمع السيارة اكيدة قلته الحنانة اطلع وخشيت واعطيت لسيدي الفانيليا ولامي القفطان وقعدت انحكيلهم علي الناس اللي اتقول مستغولة وهي تشري وتقيس وترد وامشيت وتيت الماكلة اللي شراها خوي السمح حسن واقربتها لسيدي شاف للسفرة وقالي هظا شنو ياطفلة قتله نوض كول ياسيدي ماكلة المطاعم وامشيت للمربوعة لقيت خوي بوشعر امسبس يعني نختصره خوي شبيه الافغان امتكي قتله هيا تعال كان بتاكل ومانكذبش عليكم شريتله بالخفية علي خوتي شيشة رائحة واشخاشير هو صحيح ديما ايعفس فيها بنقة النقاب لكن عاد الحق احنين اعليا وماهوش كثار وحي ابتسم لانه مايعرف ايضحك ماهو الضحك عندهم حرام ياذوب ايبانو سنونك وقالي شكرا حقيقة اني ديما انحن اعليه لانه ديما ابروحه ماايخالط في حد من يوم روح من الجبهة واخوي طارق قالي خيره اني ماجبتيلي رائحة والاغير رواق خوك يليلة حرفة قاله خودها مانبهش لكنة الشرق غالبة علي كلامه وزايدته سماحة علي سماحة ماهي مقيولة القرد في عين اخته غزال ههههههه اوكانكم من برق الليل لاوي صقايته ومايبيش ايكلمني طز حتي اني ميته غير علي كلامه وماباش ايتعشى معانا وامشي فتح حكة طن واكلها في الكويجينة واتعشيينا واني بعد غسل الماعين خشيت للدار وسكرتها نبي انشوف حاجاتي وانقيسها علي المرايا اللي امعلقة في الحيط هيه ياكبدي لمنو نلبس اقعادهم قعدات في الدولاب
ونمت واني نحلم في حلم البناويت
والصبح نوضت المطر جرتها صابة في الليل وارميت السفنز و وارميت عرفتوا عاد تو البراد علي الكنون وناض سيدي وهو ايقولي يابنت نبهي خوتك علي اصغارهم قالك عصابات ايخطفن في الصغار قتله ريح بالك جماعة المدرسة ايمشوا في الميكروات اشقي بحالكم اسياهم معاهم
شوية وبوي يسأل في خوي حسن علي الاخبار قاله حسن وهو حمقان غوغة ردوه جماعته والمربح لابد مداير روحه مايندري ياولله اعليك امربح
المربح بلهجة سيدي عبد الجليل وبلهجة مرات خوي الضاوي بوشنة
المهم سيدي طايرتله من الانتخابات كل يوم ايفصلوا ويقضوا وسيدي خايف ماايحصل امقعيد مع الجماعة اه ياجماعة زعم ايفوز سيدي وايصير بي وينادوني يابنت البي زي ماكانوا اينادوا في عمتي
يتبع انسيت انكمل ليكم رد الراجل علي مراته قالها الحمي جنة والعزوز التوبة وارزي ربيع العين في مكتوبه
وتوا هيا بسلامة المطر اتصب واني بنمشي اندخل احاويجنا من علي الحبل
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء فبراير 01, 2012 5:17 am

صباح الخير صباح

حليب الحكة بالشاهي المنعنع
اسكتو ساكتة مش البارح اقريب نحسبت روحي بنودع الدنيا
بعد ما دخلت الحوايج من علي الحبل قمزت بحدا سيدي وامي وابديت انطبق فيهن
وارتحت من تطيب العشي ماهو مرات خوي الضاوي جاينيها نسوين خوتها وجابتنا صونية كسكسي بالبصلة وهاك لحيمات الخروف اعليها
قالك ياباب لحم الخرفان وصل لخمسة وعشرين جنيه
ليبيا حرة ياباب شنو تحسابوا مانة الحرية ساهلة
المهم اتعشينا واشربنا المشريبات واتوسيطة الشاي الثالثة ياودي خشيت للداري وقلت لامي كميلها حسيت نخصة في جاشي
سيدي قالي هظا برد غمسي روحك بالزيت والقاز وراس بنيتي توا اتنوضي الصبح زي العفريت
وسمعت كلام سيدي وغلفت روجي بالزيت والقاز وانغميت وشوية ياخال مع الساعة 3 نوضت النفس هارب وصوتي اتقول عليا فروج مخنوق
وناضت امي وناض سيدي وناضو خوتي الكل ومين شوفتهم قلت وك عليك يامواطنة شورك بتودعي وقالي خوي الضاوي هيا وصي وسيدي ايقوله درق عليا وجهك فالك في جعلالك
ياكبدي كان متت سيدي منو بيسرح بشويهاته
وجي خوي رواق وبدي يقرأ عليا قاله حسن شنو تحسابها ملبوسة
هز راسه وهو ايقول استغفر الله وابدي يقرأ عليا مانندري شنو ايتمتم دوب شواربه
وامي اتقوله ارفع صوتك ياولد
وخوي طارق المتلقلق ايوشش في ودني وهو ايقولي بعد هالقرية لونك اطيري في كابول
وشوية اهديت بعد ماجبولي مية وسكر
وقال سيدي جت فاشيه يابنيتي واغطوني وخوي حسن قال اختي ترقد في فراشها واللي يبي ياكل اونه الكويجينة قدامه
وارقدت وناضوا خوتي من الصبح ولعوا الكانون وطارق دارها عصيدة قال سيدي علي الطلاق مادقتها من ايام الهجة للشرق
ايوه وحسن زي المرا الفالحة قعمز في مكاني وابدي ايعمر في البراد
ولكنتي خوي رواق وبرق الليل تنابلة مادروا شي ياودي برق الليل انسي عركته لي يوم مشيت السوق و جابلي ماهو عارفني انحب الشكلايط طريفات وقالي ردي بالك تعطي منهم للمناجيه
دراري خوتك وقعدت في مكاني اتقول عليا عروس يوم كسوتها
ماني امصدقة روحي
ياخال
وشوية ياباب جو انسوين خوتي واصغارهم وبدي الوحي والهرج والمرج وسيدي ايقول نقصوا وحي روسنا بتتكسر ومرات خوي اتقول لامي ياحاجة شاكير جاكم جاكم
وامي اتقولها اسكتي يامنجوهة طارق قعد ماطلعش ماهو طارق طاري شاكير ماايحبه
كل خوتي حتي جماعة كابول ساكتين الا طارق اتقول عليه البلاد ليه ابروحه ومايتحمل يسمع غير اللي في راسه
وشوية قربتلها يابنتي وين شاكير القتيه وحمزة شنو اخباره وك ياكبدي مايطلع منها امي
وناضت مرات خوي المصراتية ولوت شالها علي راسها وهي اتقول لمرات الضاوي نوضي الحقيه شاكير كانك تبيه
وولعت الحرب الاهلية من جديد في حوش سيدي
وهات شنو ايطفيها
وحتي اشعار اخر مواطنة نت تنهي راسلتها لهذا الصباح
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء فبراير 01, 2012 9:29 am

نهاركم سعيد مبروك عقب هالمطر ياوجوه الخير
وقفنا في حرب انسوين خوتي حامية الوطبس
اللي كان ولعت ويش ايطفيها
وبدوا في تلقيح الكلام وتخوين بعضهم
وعندها قاتلي امي دونك نادي سيدك
وامشيت نجري للداموس ياوالله اعليك حالة سيدي كان غرقان في شاشة التلفزيون
ايتفرج علي مسلسل تركي
وين شافني دار روحه ايغير في المحطات
قالي خيرك قتله نوض ياسيدي حرب كناينك ولعت من جديد
قالي يخدة اتسوقهم توا وين يدهشوا يسكتوا
المهم اتركنت بحدا سيدي ياودي من وجهه تقميزتي مش جاية علي باله قالي نوضي شوفيهم قتله فكني منهم فخار ايكسر بعضه
وحتي سيدي مايطلبش مني طلب ثاني قتله
سيدي
قالي خيره سيدك
قتله شنو صار في الانتخابات اترادع في تقعميزته
قالي كلمت اليوم عمك في بنغازي وقالي ماباين شي الدنيا حايسة في بعضها
وماهم عارفين وين يعفصوا
قتله زعما ياسيدي بنولي بنت بي وانت بي
قالي بري بو قرقيط ايقرقطك
سيدك طول عمره بي ولد بي
غير الزمان الاعوج
وقعد ايحكيلي علي جدي امنين كان ايام زمان وهو راكب في المرسيدس والسواق ايسوق بيه وكلمته ماتنزل اوطا وجداك ايخدمن فيها اربعة غير من الخدم
قتله مانه خيره اني نسرح بالسعي من طابية لطابية اتقول عليا بنت سارح
علاش مش حتي انت اتجيب خدم من تونس والا مصر والا حتي النيجر ويخدموك
نتطور عليا نوضي يخده اتسوقك ناقص غير اندخل علي انسوين خوتك الخدامه
هيا بري تيبلي الشاهي
ونوضت واني نحلم اني بنت بي زي ورد الخال ونسكن زيها في حوش كبير لين انريحو فيه واخشيت الحوش لقيتهم قاعدات ايتناقرن علي شاكير وحمزة والمربح
اللي مات والمربح اللي جي في مكانه
قربت العالة وقلتلهم راهو سيدي قالكم اللي مش ساكته مااتكون الليلة غير طالق بالثلاثه
وارميت البراد علي الكنو ن وقلت لمرات خوي المصراتية وراس خوي سعد الايام ديرينا عجة مصراتية
ياودي عمرها ما رفضتلي طلب قالتي من عيوني ياليلة حرفة وك ياكبادي اسمي قوي علي الودن وخش سيدي وسكتت مرات خوي الضاوي وشوي رن التلقون علي خوي حسن قاله سيدي منو ياولد قاله كتيبة العقم
شنو قلت قاله ولدك سعد الايام ايسلم اعليك وبدي يضحك في التلفون وسيدي يشبحله
يبي يعرف شنو فيه
سكر حسن التلفون قاله ياسيدي قالك جماعة سكروا في الاردن لين معاد عرفوا الخبط الابيض من الاسود وين ناضو شكلوا بوابة
في الاردن ايحاسبوا روحهم في راس اجدير والا في ذهيبة
سكت سيدي وقاله زيك انت زي خوك ماكم شاربين من نفس البئر
زي هاليوم ركبت فيكم غبارة وسيبتوني وخشيتوا الفيافي
واحني علي هالكلام لين ابدوا صغار خوي شادين في عمهم حسن ويطلبوا في شيطان الشيشة وخط والوح
قالهم سيدي شنو بديروا بيهم اونه عمكم طارق عنده الميم ط توا ايضربلكم بيها للصبح
وفيشتوا انتم اوياه وحتي عمتكم
يتبع مع مواطنة نت
الرجوع الى أعلى الصفحة اذهب الى الأسفل
يوميات مواطنة ليبية
عضو نشيط


عدد المساهمات : 118
نقاط : 127
تاريخ التسجيل : 19/01/2012

مُساهمةموضوع: رد: حكايتي امغير اسمعوها   الأربعاء فبراير 01, 2012 11:46 am

مسائكم بلخير
ياهلنا
ياللي مخمودين
توا اتقول عيني تشبح
فيكم زي القنافيد في البطانيين
واللي ايجغم في السحلب واللي في الشاهي واللي يتفرج واللي ايهدرز
المهم تعليقا علي صورة العصيدة اللي اتكلمت عليها اختنا الغزال
والله ياباب ماغير هظا حال ليبيا
عصيدة
وكل واحد ياخد في لقمة
ويبلع
اه يادنيا
ايه قلتلها الدنيا قلابة امنين اتروق اتدير ضبابه
المهم دارتنا مرات خوي العجة المصراتية واكلينا منها لين طلعت من خشومنا
صحيحتين علي قلوبنا
وشربنا الشاي بالكاكاوية
ونسوين خوتي خدوا فروخهم وفيلوا للحياشهم وخوتي رواق طلع قال عندي عشي بره
وبرق الليل عدا لطرابلس
قال مانيش امروح ماتنشغلوش عليا
وحسن وطارق ايلهدوا مع الهاديين
وامي اتخالي فيا نوضي يابنت فركسي التلفزيون علي شاكير وحمزة

مرات خوك قالت جيناكم
جيناكم
اسكتي يامي يسمعك سيدي
لوته بطاحك بطريحة اتحكي عليها العرب سنيين
اني مانعرف انفركس بري لكنتك
قالتي لايابنيتي
شنو بندير بيهم غير قلت نسمعوا شن مازال ايخرفوا
عليك عزائز وخلاص والله مالاقي مايخدم مدير ايراسا نزل هالخبر ومرات الضاوي ماصدقت سمعاته
اخ الواحد غير شنو بيقول

سيدي هابل في جرة الاتراك
وامي هابلة في جرة شاكير وحمزة
واني قعدة انتحواس بينهم
مع كمشة معزرة
غاميني في هالحوش بين اربعة احيوط
ناضت امي وين بديت انعلي في صوتي
وقالتي
اقعدي فيها
يكلمتي وليلي
وياباب دارت ما في راسها ولبست شلاكتها واتغطت ببخنوقها
وقالت ماشية لحوش خوك الضاوي
ماتحسبيني علي العشي ياكبادي علي امي
قال سيدي نوضي حتي انتي ابلحقيها
وك علي سيدي هظا كله باش يحضر بائعة الورد
قتله اني امتبوردة ياسيدي
قالي غمي روحك ببطانية وبري وسعي خاطرك
وامشيت لحقت امي
قاتلي خيرك يامطيورة لحقتني
كيف اتخلي سداك بروحه
ماهوش شيبانيا كان هظا والله انقعدله زي مسمار جحي في تركينته
قالتلها مرات خوي خليها
حتي الدراري يبوها بحداهم
ايوه مرات خوي تبيني انقري افروخها
مش قردها حنانة ماهي مقيولة
ياحوش مافيك امي ماانجدد عليك
المسارب
مانلقي
فيك
كان النسي لوايات الشوارب
الرجوع الى أعلى الصفحة اذهب الى الأسفل
 
حكايتي امغير اسمعوها
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 4انتقل الى الصفحة : 1, 2, 3, 4  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
•·.·°¯`·.·•مـنـتـدى إيـرآســـآ درنـة •·.·°¯`·.·• :: •·.·°¯`·.·•آلمنتدى آلعآم •·.·°¯`·.·• :: يوميات مواطنة ليبية-
انتقل الى: